सुन्दर मोडेल देख्दा जसलाई तनाब हुन्छ

 राजभाइ सुवाल ग्ल्यामर फोटोग्राफर

सुन्दर र सेक्सी मोडेललाई रिलमा उतारिरहँदा ग्ल्यामर फोटोग्राफर राजभाइ सुवालका मनमा के-कस्ता भावना आउँछन् होला ? उनी भन्छन्, 'मलाई त तनाब हुन्छ । म कुनै पात्रको जुन किसिमको आकर्षण र सुन्दरता आँखाले देख्छु, त्यसलाई क्यामेरामा उतार्न सक्छु कि सक्दिनँ भनेर तनाबग्रस्त हुन्छु ।'
नेपालका नाम चलेका ग्ल्यामर फोटोग्राफरहरूमा राजभाइ सुवाल पनि पर्छन् । ०४१ सालमा पहिलोपटक क्यामेरा समाएका उनले त्यसको सात वर्षपछि ग्ल्यामर फोटोग्राफी सुरु गरे । अहिले उनको आफ्नै घरमा आफ्नै स्टुडियो छ । यसलाई नेपालको सबभन्दा भव्य स्टुडियो मानिन्छ । 'मैले युरोपका विभिन्न देश घुमेर, त्यहाँका स्टुडियो हेरेर यो स्टुडियो बनाएको हुँ,' उनी भन्छन् 
आफूलाई सबभन्दा पहिले फोटोग्राफर हुँ भन्न रुचाउँछन्, उनी । 'र, त्यसपछि मात्रै ग्लामर फोटोग्राफर हुँ । र, एड फोटोग्राफर पनि हुँ,' उनी भन्छन् 
आउटडोर र इनडोरमध्ये उनलाई इन्डोर फोटोग्राफी राम्रो लाग्छ । 'किनभने यसमा हरेक कुरा आफ्नो नियन्त्रणमा हुन्छ । आउटडोरमा केही असुविधा हुन्छन् । जस्तो, समय व्यवस्थापन गर्न गाह्रो हुन्छ,' उनी भन्छन् 
सेक्सी (सुन्दर र आकर्षक) मोडेललाई रिलमा उतारिरहँदा उनका मनमा के-कस्ता भावना आउँछन् होला ? यो मेरो काम हो या व्यवसाय हो भन्ने भावबाहेक । 'मलाई त तनाब हुन्छ,' हामीलाई चकित पार्नेगरी उनी भन्छन्, 'म कुनै पात्रको जुन किसिमको आकर्षण र सुन्दरता आँखाले देख्छु, त्यसलाई क्यामेरामा उतार्न सक्छु कि सक्दिनँ भन्ने तनाबग्रस्त हुन्छु ।' उनको यही 'तनाब' का कारण धेरै सुन्दर फोटा खिचिएका छन् 
भारतमा ग्ल्यामर फोटोग्राफरले धेरै चान्स मार्छन् अर्थात् मौकाको फाइदा उठाउँछन् भनिन्छ । त्यहाँ मोडेलहरूको विभिन्नखाले शोषण गरिएको कुरा बाहिर आउँछन् । नेपालमा चाहिँ स्थिति के छ नि ? 'हरेक पेसामा चान्स मार्न खोज्ने मान्छे हुन्छन्,' राजभाइ भन्छन्, 'नर्सकेा शोषण गर्न खोज्ने डाक्टर होलान्, एअर होस्टेजको फाइदा उठाउन खोज्ने पाइलट होलान् । आफूभन्दा तल्लो तहका कर्मचारीलाई हेप्ने या उसबाट नाजायज फाइदा उठाउन खोज्ने हाकिम होलान् । त्यसैले यो व्यक्तिको नेचर-प्रकृति)मा भरपर्ने कुरा हो । जहाँसम्म मेरो सवाल छ, मैले त्यस्तो नाजायज फाइदा उठाएको छैन ।'
पोज मिलाउन मोडेलको शरीरमा छुनुपर्ला, कपडा मिलाइदिनुपर्ला । त्यतिखेर उनलाई अप्ठ्यारो लाग्दैन ? 'के-को अप्ठ्यारो नि !' उनी भन्छन्, 'कामै त्यस्तो भएपछि । कसैको शरीरमा बद्नियतले छोए पो अप्ठ्यारो लाग्नु !' अनि, विपरीत लिंगीप्रतिको स्वाभाविक आकर्षण त हुन्छ होला नि ? 'त्यो त भइहाल्छ नि ! तर, त्यो अपराध होइन,' उनी भन्छन् 
०००
फोटोग्राफरले सोचेको कुरा क्यामेराको माध्यमबाट रंग र प्रकाशको व्यवस्थापन गरी सिर्जना गर्नु फोटोग्राफी हो भन्छन्, राजभाइ । ०४१ सालदेखि फोटोग्राफी सुरु गरेका हुन्, उनले । 'विवाह, पार्टीमा पनि फोटो खिचे । फिल्मको छायांकन पनि गरेँ,' उनी बताउँछन्, 'अरू विषयमा पनि फोटोग्राफी गरेको छु ।' उनको अनुभव छ- अनुभवी मान्छे क्यामेरापछाडि भयो भने फोटो राम्रो हुन्छ 
अचेल नेपाली फोटोग्राफरको संसार निकै ठूलो भइसकेको छ । 'यहाँ सीप भएका र नभएका दुवैथरी छन्,' राजभाइ भन्छन्, 'डिजिटल प्रविधिका कारण पनि धेरैजना यस क्षेत्रमा आएका होलान् ।'
कसैलाई स्टार बनाउन ग्ल्यामर फोटोग्राफरको कति भूमिका हुन्छ होला ?
'९० प्रतिशत,' उनले प्रतिशतै तोकेर भन्दिन्छन्, 'मोडेलिङ या एक्टिङमा अभिरुचि भएकाहरूको निर्देशक, निर्मातासँग सीधा सम्पर्क हुँदैन । उसलाई बजारमा ल्याउने ग्ल्यामर फोटोग्राफरले हो । एकप्रकारले ग्ल्यामर फोटोग्राफर नयाँ कलाकार तथा मोडेलका लागि निर्माता/निर्देशकसम्म पुग्ने पुल बन्छ ।'
रातोदिन मोडेलसँग बसउठ गर्ने राजभाइका अनुसार मोडेल हुन हाइट र फिगर मात्रै भएर पुग्दैन । 'मुख्य कुरा इच्छाशक्ति हुनुपर्छ । पेसाप्रति इमानदार, समयको ख्याल गर्ने (पंकच्युअल), अभिनय क्षमता भएको हुनुपर्छ,' उनी भन्छन्, 'मोडेलिङ कुनै पनि हालतमा शरीर प्रदर्शन मात्रै होइन, यो मूलतः एक विशेष भाव या उद्देश्यको अभिव्यक्ति हो । र, हो एक विशिष्ट कला ।'
०००
नेताहरूबाहेक सबै चर्चित मोडेल, नायक/नायिकालाई उनले आफ्नो क्यामेरामा उतारिसकेका छन् । उनले क्यामेरा किन्नमा थुप्रै खर्च गरेका छन् । '४०/५० लाख रुपैयाँजतिको क्यामेरा किनिसकेँ होला,' उनी भन्छन् । क्यामेराको यही ब्रान्ड राम्रो भन्ने लाग्दैन, उनलाई । 'राम्रो फोटोका लागि क्यामेरा पनि महँगो हुनुपर्छ भन्ने होइन । आफूलाई जुन क्यामेरा सजिलो लाग्छ, त्यही बेस्ट ब्रान्ड हो,' उनी भन्छन् । उनले धेरै फोटो खिचिसकेका छन् । 'सन् २००२ सम्ममा नेगेटिभ गन्दा ६ लाख नाघेको थियो,' उनी भन्छन् 
पहिले-पहिले फोटोग्राफरको जिन्दगी भरिया र सुकुम्बासीको जस्तो थियो भन्छन्, उनी । 'पैसाको अभावले कहिल्यै नछाड्ने, सधै केही न केही कमी भइराख्ने !' राजभाइ आफ्ना दुःखका वेला सम्झिन्छन् । तर, संघर्षका दिनमा उनले श्रीमतीबाट पर्याप्त भरोसा पाए । 'पैसाको अभावका कारण मैले झन्डै फोटोग्राफी नै छाडिदिएको थिएँ,' उनी भन्छन्, 'तर, त्यसवेला मेरी श्रीमतीले मलाई आर्थिक रूपमा धेरै भरथेग गरिन् । मेरो आजको सफलतामा उनको ठूलो योगदान छ ।'
अहिलेचाहिँ फोटोग्राफरको जिन्दगी कसको जस्तो छ नि ? 'कमाइका हिसाबले अहिले धेरै राम्रो भएको छ,' उनी भन्छन् 
कारणवश उनले आफ्नो पहिलो क्यामेरा बेचे तर, पछि उनलाई असाध्यै ननिको लाग्यो । आठ वर्षपछि उनले त्यही क्यामेरा किने । 'पहिलो क्यामेरा फोटोग्राफरका लागि असाध्यै पि्रय हुन्छ,' उनी भन्छन्, 'मैले दुई हजार रुपैयाँ जति बजार मूल्य भएको आफ्नो पहिलो क्यामेरालाई १८ हजार तिरेर किनेँ । मलाई पहिलो क्यामेराको यति माया छ कि मसँग भएका सबै क्यामेरा चोरी भए पनि म दुःखी हुनेछैन, तर पहिलो क्यामेरा चोरी भयो भने अत्यन्तै दुःखी हुनेछु ।'
उनलाई आफूले खिचेका फोटोमा सबभन्दा राम्रो लागेको रोटरी क्लबले बनाएको अपांग मैत्री विज्ञापनको हो । यसमा राजेश हमाल प्रमुख मोडेल छन् । 'यसमा मैले राजेश हमालले दिएको फिलदेखि सबै मुभमेन्ट क्याप्चर गरेको छु,' उनी भन्छन् 
उनी वेला-वेला काठमाडौंका स्टुडियो फोटोग्राफरलाई उच्च कोटिको प्रशिक्षण दिने गर्छन् । 'अबको पाँच वर्षमा काठमाडौंका फोटो स्टुडियोलाई अन्तर्राष्ट्रियस्तरको बनाउने इच्छा छ मेरो,' उनले आफ्नो इच्छा व्यक्त गरे । तर, एउटा साँघुरो कोठा भाडामा लिएर सानो कम्प्याट क्यामेरा र दुईवटा लाइटका भरमा स्टुडियो चलाउने अहिलेको प्रचलनमा उनको इच्छा कम्ती चुनौतीपूर्ण लाग्दैन 
ग्ल्यामर फोटोग्राफर बन्न चाहनेलाई उनको सुझाब छ, 'यो राम्रो पेसा हो । यसमा आम्दानी पनि आकर्षक छ । तर, यस पेसामा छिर्दा मनमा खोट लिएर नआउनुहोला । ग्ल्यामर मोजमस्तीको क्षेत्र होइन । यो कला र समर्पणको क्षेत्र हो ।'
राजभाइ सुवालका नजरमा फोटोजेनि
नायक
शिव श्रेष्ठ
निखिल उप्रेती
आर्यन सिग्देल
विनय श्रेष्ठ
बाबु बोगटी
नायिका
सञ्चिता लुइँटेल
मेलिना मानन्धर
रेजिना उप्रेती
विपना थापा
झरना बज्राचार्य
मोडेल
स्नेहा राणा
माल्भिका सुब्बा
उषा खड्गी
नम्रता श्रेष्ठ
सदीक्षा श्रेष्ठ (मिस नेपाल)
शब्द/तस्बिरः श्रीधर पौडेल

Recent Posts

Loading...
दैनिक
रेडियो/ टेलिभिजन कान्तिपुर एफ. एम. बीबीसी नेपाली सेवा चाइना रेडियो रेडियो दोभान रेडियो नेपाल रेडियो सगरमाथा हिट्स एफ. एम. सगरमाथा टेलिभिजन एभिन्यूज टिभी हिमाली स्वरहरू व्रिटिस गोर्खा रेडियो उज्यालो राष्ट्रिय नेटवर्क एसबीएस रेडियो - नेपाल एबीसी समाचार

साप्ताहिक
अन्य उपयोगी वेबसाईटहरू नेपाल अमेरिका पत्रकार संघ मेरो संसार शब्दाङकुर साहित्यीक समकालीन साहित्य खसखस कमिटी टु प्रोटेक्ट जर्नालिष्टस् गोरखा न्यूज सेब्स साझा.कम काठमाण्डू न्यूजलाईन नेपाली साहित्य मञ्च नेपाल होराईजन्स साँझको समाचार नेपाली न्यूज यूएसए हालखबर अनलाईन अनलाईन खबर प्रेस नेपाल नेपाली कला साहित्य डिसी नेपाल दौंतरी फुलबारी

मेरो कन्ट्रोल प्यानल

New Post | Settings | Template Designer | Design | Edit HTML | Fonts and Colors | Moderate Comments | Sign Out